Home
انت هنا : الرئيسية » أدب وثقافة » معذور يا هالقلب مهما ندبت فرقتها

معذور يا هالقلب مهما ندبت فرقتها

فتحت الباب وطلعت على السكيت
وضبضبت آهاتي بأطراف شنطتها
تطلعت فيها وما عرفت شو حسيت
خفق قلبي ولحق خطوات دعستها

ايدي على خدي من القهر حطيت
تذكرتها طفلة عم تفرح بمشيتها
جربت اضحك ما قدرت….غصيت
معذور يا هالقلب مهما ندبت فرقتها

ولمحت تنهيدة بكل زوايا البيت
ودموع متكية عباب غرفتها
حسيت بفقر حالي مافي ببيتي زيت
ولا راضي بكنوز الدني بيع شعرتها

قربت صوبها ومن ورد الضنا شميت
وعبيت صدري من عطر صبوتها
ولفيت ايديي ع ضهرها وشديت
ونزلت دموعي وما قدرت خبيتها

يا طيار دخلك لوين نورما وديت
وسرقت من عين احلام غفوتها
نصر وبرهوم قالوا هاليوم ما تمنيت
ونارمين فاقدة لخناقة رفيقتها

مع السلامة يا حنونة كل البيت
انتبهي يا بابا من الغربة وقسوتها
لا عاد يفيد القهر ولا كلمة يا ليت
هيك مخلوقة الدني…الزواج سنتها

تحملت وجع فراقها وعالجرح عضيت
محرروسة بأيد الله يا بابا وعنايتها
رح يبقى عطرها مكلل زوايا البيت
مهما علينا طولت غيبتها

غزوان الحواط
15337472_1377595852251127_6004881023817582601_n

عن الكاتب

عدد المقالات : 1836

اكتب تعليق

© 2013 جميع الحقوق محفوظة لجريدة الرأي العام ALRAI-AM

Design By Sage-Computers © 2013

الصعود لأعلى